Shyamachi Aai -‘श्यामची आई’

मातेचा महिमा हे साने गुरुजी यांच्या ‘श्यामची आई’ या पुस्तकातील मध्यसूत्र आहे. त्याबरोबरच सुसंस्कृत व बालबोध घराण्यातील साध्या, सरळ व रम्य संस्कृतीचे चित्रही यात आले आहे. श्यामच्या आईच्या आठवणी देताना श्यामच्या गोष्टी यावयाच्याच. पुष्कळांना असे वाटत असेल की, या श्यामच्याच गोष्टी आहेत; परंतु या गोष्टींतून शेवटी मातेचे प्रेमच बाहेर पडलेले दिसेल. श्यामला स्वतःचा मोठेपणा किंवा प्रौढी सांगावयाची नसून आईची प्रेममय शिकवणच प्रकट करावयाची आहे. आईला पूर्णपणे प्रकट करण्यासाठी म्हणूनच स्वत:ला त्याने प्रकट केले आहे. त्याने प्रकट होणे, म्हणजे त्याच्या मातेचेच प्रकट होणे होय. मातेबद्दल ज्यांना ज्यांना म्हणून काही भावना आहेत, मायलेकरांच्या थोर व पवित्र प्रेमाबद्दल ज्यांना ज्यांना म्हणून काय वाटत असेल, त्या सर्व अधिकृत रुचीच्या लहानथोर बंधुभगिनींस ‘श्यामची आई’ हे कथात्मक पुस्तक आवडेल व ते हृदयाशी धरतील, अशी साने गुरुजींना खात्री होती. आजही हे पुस्तक सर्व लहानथोरांना निश्चितच प्रेरणादायी आहे.